الشاعرحسين المهندس
الرادودأحمد فيصل المؤمن
العام الهجري
١٤٤٨هـ
المناسبة
أربعين الإمام الحسين
لغة القصيدة
عامية
عدد الأبيات
٧٤
تحميل ملف القصيدة
lightbulb
lightbulb
الطف وصلناها
نور اعيوني يالسجّاد نَبض الگلُب مِني زاد
بانَت حَنَاياها الطف وصَلناها
چنّه يا بومحمد ازداد اضطرابي
مدري من بانت إلينا هالروابي
وگلبي المكسور في نبضه عذابي
زيّد اعليّه مصيبه في مُصابي
هذي چنها كربله ارض اغترابي
الأرض اللي خذت عَزي وشبابي
هذي تُربة كربله
وريحة أهلي ماثِله
فيها شَمّيت ريحة العنبر
دمعي بالحاله جرى
هذا عزي بالثَرى
في عُيوني
صورة المنظر
صورة احبّه اگبالي
تِفري وتِهد دَلّالي
لا ما نَسيناها
الطف وصَلناها
تصفگ الراحات بالأحزان واتنوح
وتذكر حسين الشفيه فيها مذبوح
يبن اخويه من گبل ما تطلع الروح
دلني في وينه الگبر خليني باروح
اذكره جثه بليا راس مَطروح
وصدره من حد الثلاثي والله مفتوح
گبر ابويه نُوصَله
عمه ويا العايله
نِنصُب احزان اربعينيه
راسه يرجع للكُبر
مِن بعد سَفره وهجُر
و هالمصيبه تشتِعِل بيّه
يا عمّه خلف التلّه
گبر الأبو أندله
ناحت مع الآهه
الطف وصَلناها
جابر الانصاري مِن طبعه المودّه
كربله وصّل يزور حسين گصده
اغتسل غُسل الزياره ودمعه هدّه
ونَثَر الأطياب مِن مسكه وسَعده
وخَر على گبر ابو اليمه وتُربه شدّه
بالزياره ايجدد ويا حسين عهده
ياحبيب ولا جواب
يلي ساكِن بالتُراب
مِنك اوداج
أدري مگطوعه
يا سليل اهل الكساء
يا ابن خير النساء
ادري صدرك
طِحنوا اضلوعه
لحظه وإذا درب الشام
بانت سواده وأعلام
ما يدري فحواها
الطف وصَلناها
نادى بالخادم وگله شوف لخبار
مِنهو هالمگبل علينا وأنه مِحتار
چان مِن عسكر آُميه وجيش لشرار
والله ركب أهل الرساله الآل لطهار
وصّل الخادم لَگى السجّاد وانهار
وسرعه يم جابر رجع وادموعه اعبار
نادى ياشيخ ابعجل
السيد الساجِد وَصل
ويّا زينب
بت علي وفاطم
گام بالسرعه نهض
حافي يمشي وانتفض
راسه مكشوف
للوجه لاطم
مِن الإمام اتدنى
وادموعه ترسم حزنه
نادى يابن طه
الطف وصَلناها
عَمي ياجابر في هالبلده المصيبه
اتذبحت آل النبي فوگ التريبه
فرّت الاطفال من سوط ولهيبه
والله والعمّات مكسوره وسليبه
انسبينا وصارت الحره غَريبه
بينا دورات الزمن والله عجيبه
عمي ياجابر تِشوف
شِلّي سوّت هالطفُوف
في أهلنا
مِن بعد عاشِر
لو نَظَرت اللي جَرى
مِن أبويه ومنَحَره
في ثَراها
فَصَّله الباتِر
شحچي شَعدد ياعَم
عن عاشر امن امحرم
كِل محنه عِشناها
الطف وصَلناها
هذي زينب حايره ومدمعها صوبين
تندب العباس لحظه وتندب حسين
شلّي سوى بالگلب فگد الحبيبين
مِن كِثر نوحي يَعزي عَميَت العين
چنت اني أحيا ابمعزّه بين الاثنين
وكربله مِني خذتهم ساعه البين
اسعى ما بين البدور تنزف ادموعي وأزور
يالحبيب
والله منساكُم
مِن همومي وسفرتي
اعذروني يَخوتي
أُمنياتي
أبگى بحذاكم
غَصباً عليّه السَفره
طالت وشوگي جَمره
زينب وملگاها
الطف وصَلناها